1ܘܚܙܹܠܝܼ ܥܲܠ ܝܲܡܝܼܢܹܗ ܕܗ̇ܘ ܕܝܬܝܼܒܼܵܐ ܗ݇ܘܵܐ ܥܲܠ ܬܪܘܿܢܘܿܣ؛ ܟܬܵܒܼܵܐ ܗ݇ܘܵܐ ܡ̣ܢ ܠܓܵܘܵܝܝܼ ܘܡ̣ܢ ܒܵܬ݇ܪܹܗ؛ ܕܡܸܚܝܵܐ ܗ݇ܘܵܐ ܡܵܘܗܪ ܒܫܲܒܼܲܥ ܡܵܘܗܪܹ̈ܐ. 2ܘܚܙܹܠܝܼ ܡܲܠܲܐܟܼܵܐ ܚܲܝܠܵܢܵܐ ܕܡܲܟܪܘܼܙܹܐ ܒܩܵܠܵܐ ܓܘܼܪܵܐ؛ ܡܵܢܝܼ ܝܠܹܗ ܕܚܵܫܸܚ ܠܸܦܬܵܚܵܐ ܠܟܬܵܒܼܵܐ؛ ܘܠܸܫܪܵܝܵܐ ܡܵܘܗܪܹ̈ܐ ܕܝܼܹܗ؛ 3ܘܠܵܐ ܐ݇ܢܵܫܵܐ ܡܵܨܹܐ ܗ݇ܘܵܐ ܒܫܡܲܝܵܐ؛ ܘܠܵܐ ܥܲܠ ܐܲܪܥܵܐ؛ ܘܠܵܐ ܠܸܐܠܬܸܚ ܡ̣ܢ ܐܲܪܥܵܐ؛ ܠܸܦܬܵܚܵܐ ܠܟܬܵܒܼܵܐ؛ ܘܠܵܐ ܠܸܚܝܵܪܵܐ ܒܝܼܹܗ. 4ܘܒܟܹܠܝܼ ܪܵܒܵܐ؛ ܣܵܒܵܒ ܐ݇ܢܵܫܵܐ ܠܵܐ ܡܫَܟ̰ܸܚܠܹܐ ܕܚܵܫܸܚ ܗ݇ܘܵܐ ܠܸܦܬܵܚܵܐ ܠܟܬܵܒܼܵܐ؛ ܘܠܵܐ ܠܸܚܝܵܪܵܐ ܒܝܼܹܗ. 5ܘܚܵܕَ ܡܐܵܢܝܼ ܚܘܵܪ̈ܕܸܩܢܹܐ ܐَܡܝܼܪܹܗ ܐܸܠܝܼ؛ ܠܵܐ ܒܵܟܼܸܬ؛ ܗܵܐ؛ ܓܼܠܸܒܠܹܐ ܐܲܪܝܵܐ ܕܡ̣ܢ ܐܘܼܓ̰ܵܓܼ ܕܝܼܗܘܼܕܵܐ؛ ܥܸܩܪܵܐ ܕܕܵܘܝܼܕ؛ ܠܸܦܬܵܚܵܐ ܠܟܬܵܒܼܵܐ ܘܠܫܲܒܼܲܥ ܡܵܘܗܪܹ̈ܐ ܕܝܼܹܗ. 6ܘܚܙܹܠܝܼ ܒܒܹܝܦܲܠܓܵܐ ܕܬܪܘܿܢܘܿܣ ܘܕܲܐܪܒܲܥ ܚܲܝܘ̈ܵܬܵܐ؛ ܘܒܒܹܦܲܠܓܵܐ ܕܚܘܵܪ̈ܕܸܩܢܹܐ؛ ܦܹܪܵܐ ܕܟܸܠܝܵܐ ܐܲܝܟܼ ܦܪܝܼܡܵܐ؛ ܕܐܝܼܬ ܠܹܗ ܫܲܒܼܲܥ ܩܵܪ̈݇ܢܵܢܹܐ ܘܫܲܒܼܲܥ ܥܲܝܢܹ̈ܐ؛ ܐܵܢܝܼ ܕܝܼܢܵܐ ܫܲܒܼܲܥ ܪ̈ܘܼܚܹܐ ܕܐܲܠܵܗܵܐ؛ ܐܵܢܝܼ ܕܦܸܫܠܗَܘܿܢ ܫܘܼܕܪܹܐ ܠܟܠܵܗ̇ ܐܲܪܥܵܐ. 7ܘܐَܬܹܐܠܹܗ؛ ܘܫܩܸܠܹܗ ܟܬܵܒܼܵܐ ܡ̣ܢ ܝܲܡܝܼܢܹܗ ܕܗ̇ܘ ܕܝܬܝܼܒܼܵܐ ܗ݇ܘܵܐ ܥܲܠ ܬܪܘܿܢܘܿܣ. 8ܘܟܲܕ ܫܩܸܠܹܗ ܠܟܬܵܒܼܵܐ؛ ܐܵܢܝܼ ܐܲܪܒܲܥ ܚܲܝܘ̈ܵܬܵܐ؛ ܘܐܵܢܝܼ ܥܸܣܪܝܼ ܘܐܲܪܒܥܵܐ ܚܘܵܪ̈ܕܸܩܢܹܐ؛ ܢܦܸܠܘܿܢ ܩܵܕ݇ܡ ܦܹܪܵܐ؛ ܟܲܕ ܐܝܼܬ ܗ݇ܘܵܐ ܠܟܠ ܚܲܕَ ܚܲܕَ ܡܸܢܵܝܗܝ ܩܝܼܬܵܪܵܐ؛ ܘܦܝܼܵܠܲܐܣ̈ ܕܕܲܗܒܼܵܐ ܕܡܸܠܝܹܐ ܡ̣ܢ ܒܸܣܡܹ̈ܐ؛ ܐܲܢܹܐ ܕܝܼܢܵܐ ܨܠܵܘܵܬܹ̈ܐ ܕܩܲܕܝܼܫܹ̈ܐ. 9ܘܫܵܒܘܿܚܹܐ ܗ݇ܘܵܘ ܬܸܫܒܘܿܚܬܵܐ ܚܲܕܬܵܐ؛ ܟܲܕ ܒܹܐܡܵܪܵܐ؛ ܟܹܐ ܚܵܫܚܸܬ ܠܸܫܩܵܠܵܐ ܠܟܬܵܒܼܵܐ؛ ܘܠܸܦܬܵܚܵܐ ܠܡܵܘܗܪ̈ܘܼܗܝ؛ ܣܵܒܵܒ ܕܦܸܫܠܘܼܟܼ ܦܪܝܼܡܵܐ؛ ܘܙܒܼܸܢܘܼܟܼ ܠܐܲܠܵܗܵܐ ܒܕܸܡܘܼܟܼ ܡ̣ܢ ܟܠ ܐܘܼܓ̰ܵܓܼ؛ ܘܠܸܫܵܢܵܐ؛ ܘܛܵܝܸܦܵܐ؛ ܘܡܸܠܲܬ؛ 10ܘܥܒܼܝܼܕܵܝܠܘܼܟܼ ܠܐܲܠܵܗܵܐ ܕܝܼܲܢ ܡܲܠܟܘܼܬܵܐ ܘܟܵܗܢܹ̈ܐ؛ ܘܒܸܬ ܥܵܒܼܕܝܼ ܡܲܠܟܘܼܬܵܐ ܥܲܠ ܐܲܪܥܵܐ. 11ܘܚܙܹܠܝܼ؛ ܘܫܡܸܥܠܝܼ ܩܵܠܵܐ ܕܡܲܠܲܐܟܼܹ̈ܐ ܪܵܒܵܐ ܚܵܕܸܪ̈ܘܵܢܹܐ ܕܬܪܘܿܢܘܿܣ؛ ܘܕܚܲܝܘ̈ܵܬܵܐ؛ ܘܕܚܘܵܪ̈ܕܸܩܢܹܐ؛ ܘܚܸܫܒܘܼܢܵܝܗܝ ܝܼܗ݇ܘܵܐ؛ ܪܸܒܘܼ ܪܸ̈ܒܘܵܢ؛ ܘܐܲܠܦܵܐ ܐܲܠܦܹ̈ܐ؛ 12ܒܹܐܡܵܪܵܐ ܒܩܵܠܵܐ ܓܘܼܪܵܐ؛ ܕܟܹܐ ܚܵܫܸܚ ܗ̇ܘ ܦܹܪܵܐ ܦܪܝܼܡܵܐ ܠܸܫܩܵܠܵܐ ܚܲܝܠܵܐ؛ ܘܕܵܘܸܠܬܵܐ؛ ܘܥܵܩܸܠܕܵܪܘܼܬܵܐ؛ ܘܙܲܪܒ؛ ܘܐܝܼܩܵܪܵܐ؛ ܘܬܸܫܒ݁ܘܿܚܬܵܐ؛ ܘܒܘܼܪܟܬܵܐ. 13ܘܟܠ ܒܪܝܼܬܵܐ ܕܝܼܠܵܗ̇ ܒܫܡܲܝܵܐ؛ ܘܥܲܠ ܐܲܪܥܵܐ؛ ܘܠܸܐܠܬܸܚ ܡ̣ܢ ܐܲܪܥܵܐ؛ ܘܒܝܵܡܵܐ؛ ܘܟܠܵܝܗܝ ܐܵܢܝܼ ܕܓܵܘܵܝ؛ ܫܡܸܥܠܝܼ ܕܐܵܡܪܝܼ؛ ܠܗ̇ܘ ܕܝܼܠܹܗ ܝܬܝܼܒܼܵܐ ܥܲܠ ܬܪܘܿܢܘܿܣ ܘܠܦܹܪܵܐ؛ ܒܘܼܪܟܬܵܐ؛ ܘܐܝܼܩܵܪܵܐ؛ ܘܬܸܫܒ݁ܘܿܚܬܵܐ؛ ܘܗܘܼܟܡܵܐ؛ ܠܥܵܠܲܡ ܥܵܠܡܝܼܢ. 14ܘܐܲܢܹܐ ܐܲܪܒܲܥ ܚܲܝܘ̈ܵܬܵܐ ܐܵܡܪܝܼ ܗ݇ܘܵܘ؛ ܐܵܡܹܝܢ. ܘܐܵܢܝܼ ܚܘܵܪ̈ܕܸܩܢܹܐ ܢܦܸܠܘܿܢ ܘܣܓܸܕܠܘܿܢ.